Զորավոր Սբ. Աստվածածին եկեղեցու համայնքը մայիսի 22-ին վաղ առավոտյան խորհրդակատար Տեր Վահան քահանա Առաքելյանի առաջնորդությամբ ուխտի ճանապարհ անցավ դեպի Մակարավանքի միջնադարյան վանական համալիր: Ուխտավորների աղոթական ուղու սկիզբը դրվեց «Տերունական աղոթք»-ով: Աղոթքի ճանապարհն ուխտավորներին տանում էր դեպի այն հոգևոր բարձրունքը, ուր հայ քրիստոնյան հասել ու կերտել է հավատքի մեծ ուժի և ջանքերի շնորհիվ: Արդեն վերանորոգված վանքը վկայում էր, որ հայ քրիստոնյան շարունակում է իր պապերի դարավոր ընթացքը դեպի հոգևոր բարձունքներ: Իսկ յուրաքանչյուր աստիճանը դեպի այդ բարձունք չէր կարող չարտահայտվել հոգևոր և նյութականացված ձևերով, որոնց ներդաշնակ միաձուլումներից վեր են խոյացել և խոյանում են հավատքի վկայությունները՝ հավատքի տաճարները:
Հասնելով Մակարավանք՝ մինչ Սբ. Պատարագի արարողությունը, ուխտավորները համայնքի անդամ Սիրանուշ Գումրույանի ներկայացմամբ ծանոթացան Մակարավանքի կառուցման պատմությանը, ավանդությանը և զարդաքանդակների խորհրդին: Հայկական միջնադարյան արվեստի գլուխգործոցների թվին են դասվում Մակարավանքի գլխավոր եկեղեցու բեմի ճակատի անկրկնելի քանդակազարդերը, որոնց կրկնօրինակն ի դեպ առ այսօր զարդարում է Երևան քաղաքի Փակ շուկայի առաջնամասը:
Ապա ուխտավորները միջնադարից աղոթական շնչով շաղախված այդ սուրբ հարկից ներս մասնակցեցին Սբ. և Անմահ Պատարագին: Պատարագիչն էր սահմանամերձ Աչաջուր, Ծաղկավան, Կիրանց, Բերքաբեր գյուղերի և Մակարավանքի հոգևոր հովիվ Տեր Արշավիր քահանա Ասատրյանը, ով քարոզին մասնավորաբար ասաց. «Հոգիս ուրախություն է ապրում և զորանում է՝ տեսնելով ուխտի երկար ճանապարհ անցած ուխտավորներիդ աղոթակից ներկայությունը Մակարավանքում: Դարավոր պատմություն ունեցող վանքը դարեր շարունակ կառուցվել է և վերակառուցվել, հասնելով մեր ժամանակաշրջանը, որպեսզի մեզանից յուրաքանչյուրն էլ իր հերթին իր շնորհն ու ավանդն ունենա այս վանքի շինության պատմության մեջ: 15-20 տարիներ առաջ ոչ բարվոք վիճակում գտնվող Աչաջուր սահմանամերձ գյուղի սահմանամերձ Մակարավանքն այսօր արդեն Սբ. Պատարագի է հրավիրում ուխտավորներին՝ ազդարարելով այն բարի լուրը, որով ապրել և ապրում է Հայոց ազգը: Իսկ օրվա հիշատակվող Եղիա մարգարեի հիշատակությունը մեզ ուղղորդում է դեպի Աստված: Եվ այդ ճանապարհներից մեկն էլ ուխտի ճանապարհն է: Այսօր այս սրբավայրում, ձեր ուխտը նորոգելով, Սբ. Գրիգոր Նյուսացու խոսքի համաձայն, ձեր հոգիներից ներս Աստծուն փնտրեցիք»:
Այնուհետև Տեր Հայրը, դիմելով ուխտավորներին, ասաց, որ յուրաքանչյուրիս աղոթքը թող հնչի նաև մեր հայրենիքի խաղաղության համար, որպեսզի հարության հաղթանակի շնորհիվ աշխարհին ճանաչելի դարձնենք, որ Հայոց ազգը, փոքրաթիվ լինելով, արժանի է հայ քրիստոնյա լինելուն, ինչը վկայում է նաև Մակարավանքն իր հաղթական խաչով:
Սբ. Պատարագի ընթացքում դպրաց դասի երգեցողությունը կատարում էր երեցկինը՝ Գայանե Բաղրամյանը, ում միացել էին նաև մի քանի ուխտավորներ:
Արարողության ավարտին Տեր Վահանը Զորավոր Սբ. Աստվածածին եկեղեցու համայնքի անունից շնորհակալություն հայտնեց Տեր Արշավիրին, ով պատարագելով իրենց հաղորդ դարձրեց Տիրոջ օրհնությանը, և հոգենորոգ այդ օրն ունեցան՝ միասնաբար մասնակցելով Սբ. Պատարագին, իսկ ուխտավորներին մաղթեց հոգու և մարմնի առողջություն, որպեսզի զորացնեն և շենացնեն այն բոլոր ուխտավայրերը, ուր աղոթքի կկանգնեն միասնաբար:
Աստվածապարգև և դրախտանման բնության գրկում Զորավոր Սբ. Աստվածածին եկեղեցու մեծ ընտանիքը սիրո ընտանեկան ճաշ ունեցավ: Իսկ գեղեցկատեսիլ բնությունը՝ խիտ անտառները, բացատները և յուրաքանչյուր ծառ ու թուփ, ուխտավորին կոչում էին գոհաբանական աղոթքի՝ կրկին անգամ նրան հաղորդակից դարձնելով Արարչի ամենազորությանը:
Ուխտի օրն ավարտվեց, և աստվածային խաղաղությամբ լեցուն ուխտավորները հոգեպես ամրացած փառաբանում էին Աստծուն Իր տանը Իր օրհնությանն արժանանալու համար և միմյանց մաղթում էին՝ ասելով. ուխտդ ի կատար:
Կարինե Սուգիկյան
Զորավոր Սուրբ Աստվածածին եկեղեցի