Մեկնարկեց «Իմ Հայաստան» համահայկական երրորդ փառատոնը

Հուլիսի 22-ին Արարատյան Հայրապետական թեմի առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանը Ալ. Սպենդիարյանի անվան օպերայի և բալետի ազգային ակադեմիական թատրոնում մասնակցեց «Իմ Հայաստան» փառատոնի բացման հանդիսավոր արարողությանը: Փառատոնն անցկացվում է ՀՀ Նախագահ Սերժ Սարգսյանի բարձր հովանու ներքո: Համահայկական այս փառատոնը երրորդն է և այս տարի նվիրված է Հայաստանի Հանրապետության անկախության 25-ամյակին: 
Միջոցառումը մեկնարկեց ազգային Օրհներգով և Տերունական աղոթքով:

Ապա Նավասարդ Սրբազանն ընթերցեց Ն.Ս.Օ.Տ.Տ. Գարեգին Բ Ամենայն Հայոց Հայրապետի ուղերձը մասնակիցներին ու կազմակերպիչներին, որտեղ ի մասնավորի ասվում է. «Մայր Աթոռ Սուրբ Էջմիածնից Հայրապետական սիրով ողջունում ենք «Իմ Հայաստան» համահայկական 3-րդ փառատոնի նախաձեռնությունը՝ նվիրված Հայաստանի Հանրապետության 25-ամյակին:

Ուրախությամբ ենք անդրադառնում, որ փառատոնը հնարավորություն է ընձեռում շնորհաշատ կատարողներին և համույթներին իրենց արվեստով ներկայանալու և մշակութային տոնական ու հիշարժան օրեր պարգևելու համայն մեր ժողովրդին: Սփյուռքի նախարարության կողմից իրակացվող համահայկական այս փառատոնը առիթ է նաև Մայր Հայրենիքում համախմբելու Սփյուռքի Մեր զավակներին, ամրապնդելու կապերն ու փոխհարաբերությունները հայկական գաղթօջախներում և Հայաստանում մշակույթի ասպարեզի նվիրյալների միջև:

Մեր գնահատանքն ենք բերում փառատոնը կազմակերպող ՀՀ Սփյուռքի նախարարությանը և բոլոր աջակիցներին՝ մաղթելով Տիրոջ զորակցությունը նրանց ազգանպաստ ձեռնարկներին:

Աղոթում ենք, որ մեր ժողովուրդը՝ հավատարիմ քրիստոնեական իր ոգուն, ազգային նկարագրին ու արժեքներին, Տիրոջ շնորհներով միշտ ունենա հոգևոր ներուժը՝ ստեղծելու մնայուն արժեքներ, ծաղկուն պահելու իր մշակույթը և կերտելու իր վաղվա օրը:

Թող Տերը Իր Սուրբ Աջի հովանու ներքո խաղաղ պահի մեր հայրենիքը, զորացնի մեր պետականությունը, հավատքով ու հայրենյաց սիրով միասնական պահպանի և օրհնի մեր ժողովրդին ի հայրենիս և ի սփյուռս աշխարհի»:

ՀՀ Նախագահի ողջույնի խոսքն ընթերցեց Սփյուռքի նախարար Հրանուշ Հակոբյանը:

Երեկոյի ընթացքում ելույթ ունեցան աշխարհի 25 երկրներից ժամանած 48 հայկական պարախմբեր: 25-ամյա 25 երիտասարդ մեկական նախադասությամբ ներկայացրեց 25 տարիների ընթացքում Անկախ Հայաստանի` իր պատկերացմամբ հիմնական նվաճումները:

Փառատոնի նպատակն է աջակցել Հայաստան-Սփյուռք, Սփյուռք-Սփյուռք կապերի ամրապնդմանը և համագործակցության հնարավորությունների ընդլայնմանը, Սփյուռքում հայ մշակութային ինքնության պահպանմանն ու զարգացմանը, Հայրենիքի և Սփյուռքի երիտասարդ ստեղծագործողների միջև մշակութային կապերի խորացմանը, նոր նախագծերի մշակմանը:

Ինչպես տեղեկացնում է Սփյուռքի նախարարությունը, փառատոնին մասնակցության 110 հայտ են ներկայացրել աշխարհի 25 երկրից 1429 մասնակից, այդ թվում 48 պարախումբ, 11 երգչախումբ և գործիքային համույթ, 54 անհատ կատարող: Պարախմբերից, երգչախմբերից և անհատ կատարողներից 72-ը փառատոնին մասնակցում են առաջին անգամ:

Արարատյան Հայրապետական թեմի տեղեկատվական բաժին