«Ողորմության ճանապարհին հետևողը կյանք և արդարություն կգտնի»

Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և հոգևոր հովիվ Տեր Գրիգոր քահանա Գրիգորյանի գլխավորությամբ, շարունակում է սոցիալական ծրագրերի իր շարքը՝ աջակցելով կարիքի մեջ գտնվող ընտանիքներին: Դեկտեմբերի 27-ին, Զորավոր Ս. Աստվածածին եկեղեցում, Տեր Գրիգորը Խաչատրյան Սիրվարդին (69տ.) հանձնեց դրամական օգնություն (50 000 դրամ), որ տրամադրել էր համայնքի անդամ Արամ Բաղդասարյանը: Տիկին Սիրվարդն իր տղայի և երեք անչափահաս թոռների հետ բնակվում է Ազատաշեն գյուղի 13 փ., 2-րդ տ. հասցեում: Ընտանիքը ֆինանսական և առողջական խնդիրների առջև է կանգնել. տիկին Սիրվարդի տեսողությունը նվազել է, թոռներից՝ Ավետիքը (10տ.), էպիլեպսիա հիվանդությամբ է տառապում, իսկ տղան՝ ընտանիքի միակ աշխատողը, ստամոքսի վիրահատությունից հետո կրկին առողջական խնդիր ունի, ինչի պատճառով ժամանակ առ ժամանակ է աշխատում: Ընտանիքը փորձում է գոյատևել ընտանեկան նպաստի և տիկին Սիրվարդին տրամադրվող թոշակի գումարներով: Տիկին Սիրվարդն անչափ շնորհակալ էր աջակից անձից՝ օգնության ձեռք մեկնելու համար:

Ճշմարտության և ողորմության ճանապարհով ընթացողը նախանձախնդիր է, որպեսզի արդար գտնվի Աստծո պատվիրանների, մարդկանց և իր խղճի առջև: Այդպիսի մեկն ողորմած է մերձավորի հանդեպ՝ անկախ նրա ինչպիսին լինելուց, քանի որ նա իր պարտքն է կատարում անկեղծորեն՝ չմտածելով վարձատրման մասին: Այնինչ ողորմած Աստված, ինչպես նշում է առակագիրը, չի զրկում ողորմած անձին վարձատրությունից. «Նա, ով հետևում է արդարության և ողորմածության ճանապարհին, կյանք, արդարություն և փառք կգտնի» (Առակ. 21:21):

Կարինե Սուգիկյան