26 Փետրվար, Մեծ պահքի ԺԵ օր

Գրքեր

Սաղմոս ՂԷ

Օրհնության սաղմոս Դավթի

Նույն իմաստն ունի՝ Քրիստոսի առաջին և երկրորդ հայտնության:

1. Օրհնեցէ՛ք զՏէր յօրհնութիւն նոր, զի սքանչելիս արար:

Օրհնեցե՛ք Տիրոջը նոր օրհներգով, քանզի սքանչելագործություններ արեց նա:

Որովհետև հինն անցավ և ամեն ինչ նոր եղավ, քանզի սքանչելագործություններ արեց, նոր իրադարձություններ Եգիպտոսում, և մարդ լինելը, երբ շրջում են արարածներն այլ կերպարանքով:

2. Փրկեաց զնա աջ իւր, և բազուկ սուրբ իւր:

Իր աջն ու իր սուրբ բազուկը փրկեցին նրան:

Օգնության կարիք չունեցավ: Խնամակալությունն է աջ կոչում, իսկ բազուկ՝ զորությունը:

3. Եցոյց Տէր զփրկութիւն իւր, առաջի ազգաց յայտնեաց զարդարութիւն իւր:

Տերը ցույց տվեց իրենից եկող փրկությունը, ազգերի առջև հայտնեց իր արդարությունը:

Միջօրեին խաչը ելավ, և տիեզերքն իմացավ լուսատուների խավարմամբ:

4. Յիշեաց ողորմութեամբ իւրով զՅակովբ, ճշմարտութեամբ իւրով զտունն Իսրայէլի. և տեսին ամենայն ծագք երկրի զփրկութիւն Աստուծոյ մերոյ:

Իր ողորմությամբ հիշեց Հակոբին, իր ճշմարտությամբ՝ տունն Իսրայելի. և երկրի բոլոր ծայրերը տեսան մեր Աստծու փրկությունը:

Հակոբին, որ ուխտ էր արել նահապետներին՝ նրանց զավակի միջոցով օրհնել բոլոր ազգերին, և երկրի բոլոր ծայրերը տեսան, իմացան, որ Աստված է, որ ստեղծեց մեզ և փրկեց:

5. Աղաղակեցէ՛ք առ Տէր ամենայն երկիր. օրհնեցէ՛ք և սաղմոս ասացէք:

Աղաղակեցե՛ք Տիրոջ առջև, ո՛ղջ երկիր. օրհնեցե՛ք, ցնծացե՛ք ու սաղմո՛ս երգեք:

Աղաղակեցե՛ք, փրկությունն այս, որ իմացաք, ասե՛ք նրանց, ովքեր չգիտեն, օրհնեցե՛ք, քանզի դա բավական է մարդկանց՝ հատուցել Աստծուն:

6. Սաղմո՛ս ասացէք Աստուծոյ մերում օրհնութեամբ, օրհնութեամբ և ի ձայն սաղմոսաց:

Սաղմո՛ս երգեցե՛ք մեր Աստծուն օրհնությամբ, օրհնությամբ ու սաղմոսերգությամբ:

Ձայնով սաղմոս ասացե՛ք, օրհնությամբ, և այն կրկնում է՝ հոգով ու մարմնով օրհնություն տալու համար:

7. Ի ձայն օրհնութեան կռածոյ փողոյ, օրհնութեամբ ցնծութեամբ և ի ձայն եղջեր փողոյ. և աղաղակեցէ՛ք առաջի թագաւորին Տեառն:

Կոփածո շեփորի օրհնության ձայնով, օրհնությամբ, ցնծությամբ ու եղջերափողի ձայնով աղաղակեցե՛ք Տիրոջը՝ թագավորի առջև:

Կոփածո՝ արծաթի և պղնձի խառնուրդով և եղջերափողի ձայնով, եզան եղջյուրի, ինչ աննյութ բան Սինայում լսեցին, նյութի վերածեցին՝ իրենց ուրախությունը հրապարակայնորեն հայտնելով, ինչպես որ այստեղ է պատվիրում: Մենք էլ հոգով և մտքով, ինչպես կոփածո, անձը՝ ճգնությամբ և միտքը՝ իմաստությամբ ձուլելով և մարմնով, ինչպես եղջյուր՝ զորանալով և հաղթելով մարմնի կարիքներին, և այդպես աղաղակում ենք մեր թագավորի՝ Հիսուսի առջև:

8. Խռովեսցի ծով լրիւ իւրով, տիեզերք և ամենայն բնակիչք նորա, և գետք ծափս հարցեն ի միասին ձեռամբ:

Թող խռովվի ծովն իր լրությամբ, տիեզերքն իր ամբողջ բնակիչներով: Եվ գետերը թող ծափ տան միասին իրենց ձեռքերով:

Որ ծովում և ցամաքում խառն են բանականների մարմիններն ու ոսկորները, հուզվում են և խռովվում՝ դուրս տալով նրանց, և բոլոր բնակիչները՝ գազաններ, անասուններ, թռչուններ հալելու են հրով և զատվելու են մարդկային մարմինները: Եվ գետերը թող ծափ տան, ասում է այնպես, ինչը ծանոթ է մեզ՝ ձեռքերի միջոցով ցույց տալով: Նաև մարգարեներն ու առաքյալները, Հին ու Նոր Կտակարանները միաձայն հաստատում են, ոչ թե միմյանցից հեռու, այլ նույն հոգով, որ Աստծու ձեռք է կոչվում:

9. Լերինք ցնծասցեն առաջի Տեառն, զի գայ և հասեալ է Տէր ի դատել զերկիր:

Ու լեռները ցնծան Տիրոջ առջև, քանզի Տերը եկել հասել է՝ երկիրը դատելու:

Լեռները ցնծան, քանզի ապականությունները հալել ու սրբվել են ինչպես դրախտում նորոգված: Լեռները ցնծան, հատկապես որտեղ եկեղեցիներ են ու խաչեր և խաչազգեստ կրոնավորներ: Ցնծան, քանզի Աստծու շնորհներն առավել փայլում են այդպիսի լեռների և դաշտերի վրա: Նաև լեռները հրեշտակներն են և սուրբ մարդիկ, քանզի ահա եկել հասել է դատելու երկիրը, հասել է երկիրը դատելու ժամանակը: Երկու բան է դատելու՝ հոգին և մարմինը կամ՝ դևերին և մարդկանց: Նաև նրանք, ովքեր երկիր ընկան մեղքով և սիրեցին այն:

10. Դատի զաշխարհս արդարութեամբ, և զժողովուրդս իւր ուղղութեամբ:

Նա պիտի դատի աշխարհն արդարությամբ, և իր ժողովրդին ճշմարտությամբ:

Ինչպես որ ասաց, թե աշխարհ սիրողները չարից են, իսկ սրբերն աշխարհից չեն, այլ բնությամբ հասարակ, օրենքով և Ավետարանով, որոնք ժողովուրդ կոչվեցին՝ որպես ուղղիչ ունենալով լարն ու կանոնը:

 

 

Վարդան Արևելցի, Մեկնութիւն Սաղմոսացն Դաւթի, Էջմիածին, 1797 թ.

Գրաբարից թարգմանեց Գայանե Թերզյանը

24.06.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․