Տեր Գրիգոր քահանա Գրիգորյանի Սուրբ Ծննդյան շնորհավորական խոսքը

«Ծնաւ նոր արքայ ի Բեթղեհեմ քաղաքի,

Որդիք մարդկան, օրհնեցէ´ք, զի վասն մեր մարմնացաւ» (Շարական):            

Սիրելի՛ բարեպաշտ հավատացյալներ,

Աստվածապարգև, արևաբույր ուրախությամբ շնորհավորում եմ բոլորիս քրիստոնեա­կան կարևորագույն տոներից մեկի՝ Սուրբ Ծննդյան տոնի կապակցությամբ:

Ճշմարիտ քրիստոնյաների համար այս տոնը մի առանձնահատուկ քաղցրություն և ջերմություն ունի, քանզի այսօր նշում ենք Նրա ծննդյան տոնը, ով հատուկ մեզ համար ծնվեց: Նա թողեց մարդկային աչքին աներևույթ անհուն երկնային բարձունքները, որպեսզի այն մեզ համար երևութականացնի երկրի վրա: Նա մեծագույն շնորհ արեց մեզ՝ մահկանացուներիս` Իր աստվածային էությունը մարդկային մարմնի մեջ պարփակելով, քանզի դրանով անգին հնարավորություն պարգևեց մարդկությանը՝ անմիջականորեն հանդիպելու Աստծու մարդացյալ Որդուն: Հիսուս Քրիստոս երկիր եկավ և ծնունդ առավ Սուրբ Աստվածածնից մարդու կյանքն ու նրա հաղորդակցությունը Երկնային Հոր հետ վերստին նորոգելու համար: Երկու հազար տարի առաջ բեթղեհեմյան երկնակամարում վառ փայլատակող աստղը մոգերին ցույց տվեց այն մսուրը, որտեղ շնորհընկալ սուրբ Կույս Մարիամից ծնվեց Աստծու խոստացած Փրկիչը: Այսօր մեր սուրբ եկեղեցիների երկինք խոյացող գմբեթներից նայող խաչերն էլ համայն մարդկությանը ցույց են տալիս այն վայրը, որտեղ Իրեն հավատացողների մաքուր ու խոնարհ սրտերում կրկին ծնունդ է առնում Փրկիչ Մանուկը: «Մարդու Որդին եկավ փնտրելու և փրկելու կո­րածին»,- ասում է Տեր Հիսուս Քրիստոս (Ղուկ. 19:10) և հավելում. «Ես եկա, որպեսզի կյանք ունենաք» (Հով. 10։10)։ Եվ այս բարի ավետիսն է, որ այսօր միլիոնավոր բուխարիների կրակից էլ առավել ջերմացնում է մեր հոգիները, և սուրբծննդյան տոնից ծնված աննկարագրելի պայծառ ուրախությունն է, որ գալիս է հալեցնելու նույնիսկ ամենասառն ու խիստ սրտերը:

Արդ, թող եկեղեցիների սուրբ հարկի ներքո հնչող սուրբծննդյան աղոթքներն ու շարականները խնկի ծխի թևերով թռչեն դեպի յուրաքանչյուրիդ սրտերը և այնտեղ բացվեն անթառամ ծաղիկների պես՝ Քրիստոսաբույր անուշահամ նեկտարով լցնելով դրանց դատարկությունը: Թող Մանուկ Քրիստոսի լուսապսակ կերպարն անասելի ուրա­խությամբ ու հույսով լցնի բոլոր նրանց հոգիները, որոնք այդ պատկերը մեծ սիրով ու երկյուղածությամբ են կրում իրենց սրտերում: Թող Բարձրյալն Աստծու անհատնում ողորմածությամբ այս սքանչելի տոնի անհուն խորհուրդը բացվի այն մոլորյալ զավակների հոգիներում, որոնք դեռևս ճշմարտության փնտրտուքի մեջ են, և Քրիստոսակիր լույսը թող առաջնորդի նրանց դեպի միակ և իրական Ճշմար­տություն (Հովհ. 14:6): Մենք էլ մեր օրհնաբանությունները միացնենք քերովբեների, սերովբեների և երկնային մյուս բնակիչների փառաբանությանը և մեծ ցնծությամբ ավետենք ի լուր համայն աշխարհի.

«Քրիստոս ծնավ և հայտնեցավ: Մեզ և ձեզ մեծ ավետիս»:

Տեր Գրիգոր քահանա Գրիգորյան

Զորավոր Սուրբ Աստվածածին եկեղեցու հոգևոր հովիվ