- Հա՛յր, որևէ երիտասարդ, որ ամուսնանալու որոշում է կայացրել, ինձ հարցրեց, թե ամուսնական կյանքը ինչպես պետք է ճիշտ սկսել:
- Նախ պետք է մի լավ աղջիկ գտնի, որ նրա հետ իրեն հանգիստ զգա, որովհետև յուրաքանչյուրը տարբեր կերպ է իրեն հանգիստ զգում: Չնայի, որ աղջիկը լինի հարուստ և գեղեցիկ, այլ ամեն ինչից առավել պարզ և խոնարհ: Այսինքն՝ պետք է շատ ուշադրություն դարձնի աղջկա ներքին գեղեցկությանը և ոչ թե արտաքին: Այն հանգամանքը, որ աղջիկը դրական մարդ է և օժտված է գեղեցիկ սեռին հատուկ քաջությամբ, շատ է օգնում, որ տղամարդն անմիջապես նրան հասկանա և հետագայում գլխացավ չունենա: Եթե ունի նաև Աստծու հանդեպ վախ, խոնարհություն, այդ դեպքում կարող են ձեռք ձեռքի բռնել և անցնել այս աշխարհի չար հոսանքի միջով:
Եթե երիտասարդը որևէ աղջկա հետ կապված լուրջ մտադրություններ ունի, կարծում եմ, որ ավելի լավ է սկզբից նրան ծանոթացնի իր ծնողների հետ և հետո միայն ինքն էլ իր ծնողների և աղջկա հետ քննարկի այդ հարցը: Հետո, եթե խոսք են առնում և նշանվում են, (լավ կլինի, որ նշանված լինելու վիճակը երկար չտևի) տղամարդը պետք է փորձի մինչև պսակ ընկած ժամանակահատվածը աղջկան դիտել որպես իր քույր և հարգել նրան: Եթե երկուսն էլ պատվախնդրորեն պայքարեն և պահպանեն իրենց կուսությունը, այդ դեպքում Պսակի խորհուրդի ժամանակ, երբ քահանան նրանց պսակադրի, առատորեն կընդունեն Աստծու շնորհը: Որովհետև, ինչպես ասում է սուրբ Հովհան Ոսկեբերանը, պսակվողների գլուխներին դրվող թագերը հաճույքի դեմ հաղթանակի խորհրդանիշներն են:
Հետագայում, ինչքան կարող են, թող կատարելագործեն սիրո առաքինությունը, որպեսզի երկուսն էլ միշտ հաստատուն մնան և նրանց հետ մնա Երրորդը՝ մեր քաղցր Քրիստոսը: Սկզբում, բնականաբար, մինչև իրար լավ ճանաչելու ընթացքի կարգավորվելը, կարող է ունենան որոշ դժվարություններ: Սկզբում այդպես է լինում: Երկու օր առաջ տեսա մի թռչուն: Երբ դուրս էր եկել բնից, որ կերակուր գտներ և գետնից մի թիզ բարձրությամբ թռչում էր, չգիտեր, թե ինչպես հեշտությամբ բռնել միջատը և մի ժամ չարչարվեց, որ այն բռնի և ուտի: Երբ նայում էի, մտածում էի, թե ինչպես ամեն մի սկիզբ դժվար է: Ուսանողը, երբ վերցնում է իր դիպլոմը և սկսում է աշխատել, սկզբում դժվարանում է: Այն մարդը, որ մտնում է վանք, սկզբում նա էլ ունի դժվարություններ: Երիտասարդը նույնպես երբ ամուսնանում է, սկզբում դժվարությունների է հանդիպում:
- Հա՛յր, խանգարո՞ղ է այն հանգամանքը, որ աղջիկը մեծ է տղայից:
- Եկեղեցում այդպիսի կանոն չկա, որ եթե աղջիկը երկու, երեք և կամ հինգ տարի մեծ է տղայից, չի կարող ամուսնանալ:
Հունարենից թարգմանեց՝ Էդգար սրկ. Ծատուրյանը