Հայ Առաքելական Սուրբ եկեղեցին Մեծ Պահքի վեցերորդ՝ Գալստյան կիրակիի նախընթաց օրը նշում է սբ. Գրիգոր Լուսավորչի մուտն ի վիրապ հիշատակությունը: Ապրիլի 6-ին Զորավոր Ս. Աստվածածին եկեղեցու «Զորավոր» երիտասարդաց միությունը Գալստյան կիրակիի և նախորդ օրվա հիշատակության խորհուրդներին հաղորդակից եղավ Զորավոր Ս. Աստվածածին եկեղեցում Սուրբ Պատարագին մասնակցությամբ և դեպի Խոր Վիրապ ուխտագնացությամբ:
Երիտասարդները, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և միության հոգևոր պատասխանատու Տեր Վահան քահանա Առաքելյանի առաջնորդությամբ, ուխտի մեկնեցին Հայոց նվիրական սրբավայր, որ Հայոց դարձի նախասկիզբն է համարվել: Սրբավայրում երիտասարդաց միությունը, Տեր Վահանի գլխավորությամբ, սբ. Գրիգոր Լուսավորչի բարեխոսությամբ՝ միասնական աղոթք հնչեցրեց առ Տեր՝ Հայոց աշխարհի խաղաղության և Հայոց ազգի հավատի մեջ ամրապնդման ու զորացման համար:
Անյուհետև Տեր Հայրը երիտասարդների հետ զրուցեց սբ. Գրիգոր Լուսավորչի մուտն ի վիրապ հիշատակության մասին՝ նշելով, որ եկեղեցու հայրերի տնօրինությամբ հիշատակությունը նշվում է Մեծ պահոց ապաշխարության շրջանում, որպեսզի Լուսավորչի զավակները նրա մեծ համբերատարության, խոնարհության և քաջության օրինակով կարողանան հաղթությամբ և առանց տրտնջալու տանել ապաշխարության և կյանքի փորձությունների լուծը: «Հայոց առաջին կաթողիկոսն իր սրբակենցաղ կյանքով սովորեցրեց մեզ աներեր և հաստատուն հավատք ունենալ, աներկյուղ լինել չարչարանքների մեջ և ազնիվ ու հավատարմությամբ ծառայել երկնային Տիրոջը: Քրիստոնյայի համար մահը, զնդան կամ որևէ այլ տեսակի խոշտանգում ու ցավ հավերժական չէ, քանի որ քրիստոնեության մեջ մահը երբեք չի հաղթում, այլ մահին անպայմանորեն հաջորդում է հարությունը: Ինչպես որ Քրիստոս մահվան դեմ հաղթանակ տարավ, այնպես էլ Տիրոջ հավատարիմ սպասավոր սբ. Գրիգոր Լուսավորիչը կարողացավ հաղթանակ տանել խավար կռապաշտության դեմ»,- ասաց Տեր Վահանը: Սիրո ճաշից հետո երիտասարդները հոգեպես նորոգված ու զորացած վերադարձան Երևան:
Տերը խոստացել է, որ Իր շնորհներն ու օրհնությունները կշնորհի Իր հետևորդներին. «Այն փառքը, որ դու Ինձ տվեցիր, Ես տվեցի նրանց» (Հովհ. 17:22): Երբ մարդն Աստծու օրհնությամբ և օգնությամբ ջանում է մեղքերից մաքրվել, բարին սերմանել, դառնում է Բարձրյալի գործակիցը, Աստծու շնորհի մի անոթ, որից Տերն Իր օրհնությունն է հեղում շրջապատող աշխարհին: «Ով հավատում է Ինձ... նրա սրտից կենսատու ջրեր գետեր պիտի բխեն» (Հովհ. 7:38),- ասաց Հիսուս Քրիստոս: Սուրբը, որ իր հավատքը հաստատել է իր կյանքով, դարձել է աստվածային օրհնության և կենդանի ջրի աղբյուր այլ մարդկանց համար:
Կարինե Սուգիկյան
Զորավոր Սուրբ Աստվածածին եկեղեցի