Պատասխան – Սուրբ Ներսեսն այդ հարցին այսպիսի պատասխան է տալիս. «Մանկամիտ մի՛ եղեք, այլ չարիքի հանդեպ մանկացե՛ք, իսկ մտքով եղե՛ք կատարյալ` քննելու ճշմարտությունն ու հավանելու այն, որովհետև եթե զանազան քրիստոսներ լինեն, կամ զանազան աստվածներ, զանազան զորությամբ յուրաքանչյուր ազգերի տիրողներ, ճշմարիտ կլիներ կարծիքդ, իսկ Պատարագը զանազանություն կունենար` հակառակամարտ աստվածների զորությամբ կատարելու պատճառով: Ցանկացած ազգի աստծու փառքի զորությունն իր պատարագում է տպավորվում; Եթե ասես` Քրիստոս մեկ է, բայց Նրա հանդեպ ունեցած սրանց հավատը տարբերություն ունի, ուստի իմացի՛ր` այն, ինչ վերաբերում է Քրիստոսի եզակի լինելուն, մանրամասնությամբ սովորեցինք, ինչպես նաև Նրա հավատքի ընդհանուր լինելը: Ուստի եթե Քրիստոս մեկն է, և մեր բոլորի հույսը դեպի Նա միօրինակ, և Նրա անունով կոչվածներս էլ` մի հոգի, յուրաքանչյուր ազգ ընդունեց այդ: Հետևաբար Աբրահամի հավատից ծնված որդիների միջև խտրություն չկա: Ուրեմն հայտնի է, որ մեկ է Տիեզերական Եկեղեցին և նրանցում կատարված Պատարագը նույն հոգով է, քանզի ինչպես դու ես փնտրում քո նվիրական զգացմունքները կատարող Հոգին, այնպես և նա փնտրում իրենը: Եվ չնայած լեզուները տարբեր են, սակայն ոչ թե տարբեր հոգիներ են փնտրում, այլ մի, մանավանդ որ աղոթքի նույն խոսքերով և նույն խորհրդածական ձևակերպումներով են առաջնորդվում բոլոր քրիստոնյա ազգերը:

Դարձյալ օրինակ. Արեգակը մեկն է, և իմ ու նրա զգայական աչքերն է սրբում ու լուսավորում, իմանալի աչքերին լույս պարգևում: Իսկ եթե որևէ մեկը, չարությունից դրդված, ասի, թե միայն ինքն է տեսնում արեգակը, իր չարությունը ցույց կտա, բայց ինձ չի զրկի համասփյուռ լույսից այնքան ժամանակ, քանի դեռ մաքուր է իմ նայվածքը: Այնպես էլ այն ազգը, որ Քրիստոսի անունը կրող ազգն անկատար ու թերի է համարում, իր չարությունն է ցույց տալիս, և ոչ թե նրան հասարակազ շնորհից զրկում: Ուրեմն ոչ մի տարբերություն չկա Քրիստոսի պաշտոնյաների խորհրդածության միջև: Եվ նրանք, ովքեր այսպես են կարծում, դատապարտում են իրենց, այլ ոչ թե հեզության հոգին չարամտության ախտի դեմ ծառայեցնում»:

Ուրիշներն ասում են, թե Պատարագի նյութերն են տարբեր, որոնց Սուրբ Ներսեսն այսպես է պատասխանում. «Եթե հաց ու գինի չեն, որոնք ի դեպ ավանդվեցին Քրիստոսի կողմից, պարզ է, որ չեն կարող ընդունել Հոգու ներգործությունն ըստ այս խորհրդի և դառնալ Քրիստոսի մարմինը: Իսկ եթե հաց ու գինի է, ստուգապես կրում է Հոգու զորության լույսը, ինչպես ապակին` արեգակը»: