Սուրբ գրքում որևէ տեղեկություն չկա Մարիամ Մագդաղենացու և Ղազարոսի քույր Մարիամի նույն անձը լինելու մասին: Տարբեր եկեղեցիների (Ուղափառ, Կաթոլիկ, Ղպտի,) հայրեր տարբեր կերպ են ներկայացնում Աստվածաշնչյան այս կերպարը:

Սբ. Մարիամ Մագդաղենացին սովորաբար սխալմամբ նույնացվում  է փարիսեցի Սիմոնի տանը Հիսուսի ոտքերը լվացող մեղավոր կնոջ հետ (Ղուկ. 7: 36-48): Այս թյուրըմբռնումն ընդունվել է, քանի որ Սուրբ Ղուկասի Ավետարանում այդ պատմությունից անմիջապես հետո 8-րդ գլխում հաջորդում է նաև Մարիամ Մագդաղենացու մասին հիշատակություն: Ավետարաններում մենք ոչ մի ապացույց չենք գտնում, որ Մարիամ Մագդաղենացին մարմնավաճառ է եղել, ոչ էլ նույնացված է ապաշխարող պոռնիկ կնոջ հետ:  Տեղեկանալով, որ նա տառապել է յոթ չար ոգիների կողմից, դա ամենևին չի նշանակում, որ եղել է մարմնավաճառ:  Աստվածաշունչը հստակ ցույց է տալիս, որ մարդիկ դիվահարված են եղել, քանի որ չեն կարողացել նորմալ կյանք վարել: Սակայն Աստվածաշունչը նրանց երբեք չի նկարագրել որպես պոռնիկներ: