Ցույց տալու համար, որ կատարյալ մարդ է: Հիրավի, ինչպես վերևում հիշատակվեց, նրա աստվածությունը հայտնի դարձավ, բայց կամենում էր, որ նաև հայտնի դառնա, թե ինքը կատարյալ մարդ է: Այդ պատճառով, երբ քառասուն օր և քառասուն գիշեր ծոմ պահելուց հետո քաղց զգաց, սատանան մարդկային կերպարանքով եկավ, որպեսզի փորձելով իմանա, թե նա ո՛վ է: Թեպետև նրա ծննդյան ժամանակ տեղի ունեցած հրաշքների և մոգերի՝ երկրպագության գալու նշանավոր դեպքի մասին խորհելով՝ կասկածեց, թե նա է թերևս սպասվող Մեսիան, սակայն Հերովդեսից վախենալու պատճառով Եգիպտոս փախչելուց և վերադառնալուց հետո մինչև երեսուն տարեկան հասակը իբրև մի հասարակ և աննշան մարդ Նազարեթ քաղաքում բնակվելու փաստը Աստծու հակառակորդին դարձյալ մտածել տվեց, թե նա մի սովորական մարդ է:

Այդպես էլ կասկածել սկսեց նրա մկրտության ժամանակ պատահած հրաշքներին, բայց երբ քառասնօրյա ծոմապահությունից հետո սովածացավ, կարծեց, թե Մովսեսի և Եղիայի նման մի սուրբ մարդ է, քանի որ նրանք ևս քառասնօրյա ծոմ էին պահել: Ուստի Հիսուսին մոտենալով՝ համարձակորեն ասաց. «Եթե Աստծու որդին ես, այս քարերին հրամայի՛ր, որ հաց դառնան»:

Ուշադրությո՛ւն դարձրու, որ անիծյալ սատանան, ինչպես որ կերակուրի պատճառով դրախտից մարդու արտաքսվելու պատճառ եղավ, այս անգամ ևս այդ նույն շարժառիթն օգտագործեց: Բայց Հիսուսը, Սուրբ Գրքից վկայություն բերելով, պատասխանում է. «Գրված է, որ մարդը միայն հացով չի ապրում, այլ Աստծու բերանից ելած խոսքերով»: Թեև այս պատասխանի պատճառով խայտառակվելով՝ սատանան նպատակին չհասավ, բայց ուրիշ խորամանկության դիմելով՝ ուզում է նրան տաճար տանելով կրկին փորձել: Հիսուսը համաձայնում է նրա հետ գնալ, որպեսզի  նորից խայտառակի նրան: Երբ միասին եկան, և նա տաճարի աշտարակի վրա կանգնեց, սատանան ասաց Հիսուսին. «Եթե Աստծու որդին ես, այստեղից ցա՛ծ նետվիր, քանի որ քո մասին գրված է, թե հրեշտակները ձեռքերի վրա պետք է պահեն քեզ, որպեսզի ոտքդ քարին չխփվի»:

Տե՛ս, որովհետև առաջին փորձում Հիսուսը Սուրբ Գրքից պատասխանեց, այդ պատճառով այս անգամ սատանան ինքն էլ Սուրբ Գրքի խոսքն առաջ բերեց:Երբ Հիսուսը կրկին Սուրբ Գրքի վկայությամբ է պատասխանում, թե՝ «Գրված է, որ քո Տեր Աստծուն չփորձես», սատանան դարձյալ պապանձվում է և չի կարողանում պատասխանել: Այսուհանդերձ, դարձյալ հանգիստ չմնալով՝ նրան տանում է մի բարձր լեռան գագաթ, որպեսզի կրկին փորձի: Այնտեղ բոլոր թագավորությունները և նրանց փառքն ու ճոխությունները Հիսուսին ցույց տալով՝ վստահաբար ասում է. «Այս ամենը քեզ կտամ, եթե ինձ երկրպագես»:

Նայի՛ր անիծյալ սատանայի ճարահատ և խեղճ վիճակին. նենգության և հպարտության պատճառով հենց ուզեց միայն Աստծուն հատուկ պատիվն իրեն հատկացնել, Հիսուսը վճռաբար և սաստումով պատասխանեց. «Կորի՛ր մոտիցս, սատանա՛, քանի որ գրված է, թե քո Տեր Աստծուն միայն երկրպագես և միայն նրան պաշտես»:

Արդարև, Հիսուսն առաջին փորձի ժամանակ իմացավ, թե նա ով է, բայց մինչև այս պահը այնպես էր պատասխանում, իբր չի ճանաչում: Այս անգամ, երբ  Հիսուսը հայտնում է, թե սատանա է, և նրա նենգությունը բացահայտվում է, նա արդեն հուսահատված՝ ամոթահար հեռանում է Հիսուսի ներկայությունից, քանի որ անկարող էր եղել իմանալու, որ նա Աստծու Որդին է:

Թեպետև Հիսուսը որևէ կերպ կարող էր սատանային հաղթել և նվաճել նրան, սակայն իր կատարյալ մարդկությունը հայտնելու համար հանձն առավ երեք անգամ փորձվել, և այդպես հաղթել բանսարկու թշնամուն: Եվ ապա հրեշտակները գալիս, կերակուր են պատրաստում և ծառայում են նրան: Այստեղից Հիսուսը գնաց Գալիլեայի կողմը: