Պատասխան – Դու, որ Պողոս Առաքյալի այս գործը հիշատակեցիր, նաև ասա, թե դրան ներհակ ինչ է ասում. «Այժմ ճանաչեցիք Աստծուն. մանավանդ որ ճանաչում եք Աստծուն, ինչո՞ւ եք կրկին ետ վերադառնում դեպի սովորական տկարներն ու աղքատները, որոնց նորից եք կամենում ծառայեցնել ձեր անձերը: Տարբերեք օրերը,
ամիսները, ժամանակները և տարիները»: Արդ՝ ո՞ւր է հին օրենքների կիրառողը: Կարո՞ղ ես ասել, թե ինչպիսի՞ ավարտ կունենա Պողոսի գործած այդ թլպատությունը կամ դրան նմանվող հրեական օրենքների արարողությունները:
Նախ՝ ասեմ, որ այնտեղ է այդ հարցիդ պատասխանը, ուր ասվում է՝ հանուն հրեաների, այսինքն՝ իբր թե նրանց գայթակղություն չլինելու համար, քանզի տակավին սովոր չէին շնորհական օրենքի քաղցր լծին: Երկրորդ՝ Օգոստինոսը նախնական օրենքի երեք ժամանակ է մատնանշում. նախ՝ մարդեղությունից առաջ, երկրորդ՝ Ավետարանը քարոզելու ժամանակը, երրորդ՝ Ավետարանը քարոզվելուց հետո: Նա ասում է. «Նախքան Քրիստոսի չարչարանքը, հին օրենքի հին արարողությունները ո՛չ մեռած էին և ո՛չ էլ մահաբեր էին, այլ փրկող… չարչարանքներից հետո, մինչ Ավետարանի ընդհանուր քարոզչությունը, մեռած էին, բայց ոչ մահաբեր, կարող էր պահել հրեա հավատացյալը՝ հույսը դրանց վրա չդնելով»:
Այդ ժամանակ՝ Քրիստոսի մահվանից հետո, վայել չէր արհամարհել Մովսեսի օրենքն իբրև կռապաշտություն, այլ վայելուչ էր հին մարդը, այսինքն՝ հին օրենքը պատվով գերեզման դնել: Ահա այդ դեպքում է երբեմն ի հայտ գալիս Առաքյալների կողմից հին օրենքի արարողությունների կիրառումը: Սակայն Ավետարանի ընդհանուր քարոզչությունից հետո հին օրենքը ոչ միայն մեռյալ էր, այլև՝ մահաբեր:
Զորավոր Սուրբ Աստվածածին եկեղեցի