Գրքեր
Հարց 65 - Ի՞նչ է հրեշտակը:

Պատասխան – Հրեշտակը իմացական մի գոյացություն է՝ մշտաշարժ, անձնիշխան կամքով, անմարմին, Աստծո սպասավոր, անմահություն ընդունած ըստ շնորհի, այլ՝ ոչ թե ըստ բնության:

Արդ՝ իմացական գոյացություն ասվեց, որպեսզի տարբերվի բանական հոգուց, քանզի բանական հոգին պատճառից է ճանաչում պատճառ հանդիսացողին, իսկ իմացականը, այսինքն՝ հրեշտակը, պատճառը և պատճառ հանդիսացողին ճանաչում է հավասարապես:

Մշտաշարժ ասվեց՝ սիրո շարժման համար, քանի որ ստեղծված բոլոր արարածներից միայն հրեշտակներն են էությամբ ավելի մոտ բարի Աստծուն և միշտ սիրո շարժմամբ սպասավոր են Նրա հրամանին:

Կամքով անձնիշխան ասվեց, որովհետև հրեշտակի անձնիշխանությունը մարդու անձնիշխանության պես չէ՝ երբեմն դեպի բարին, երբեմն դեպի չարը: Այլ այն այսպես պետք է հասկանալ. եթե մի անգամ բարի հրեշտակն անձնիշխանությամբ բարին ընտրեց, նույն ընտրության վրա է մնում միշտ և չի փոփոխվում դեպի չարը: Նույնպես և չար հրեշտակներն են:

Անմարմին ասվեց, քանզի պարզ էություն է՝ ինքն իր մեջ կայացած, և ոչ թե, բանական հոգու պես, մարմնի վիճակված:

Աստծո սպասավոր ասվեց, քանզի յուրաքանչյուր դաս միշտ աստվածային հրամանների կամակատար պաշտոնյա է:

Անմահությունն ընդունել է ըստ շնորհի և ոչ ըստ բնության. թեպետ անմահ է հրեշտակային բնությունը, սակայն այդ անմահությունը բնությունից չունի, ինչպես կրակը բնականաբար ջերմ է, այլ Աստծո շնորհից: Եթե չլիներ նույն շնորհի զորությունը, բոլոր հրեշտակները կոչնչանային:

ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․