Դեպի Աստված տանող հոգենորոգ ուղիներից մեկը

Դժվար է լեռ բարձրանալ, երբ չես տեսնում լեռան գագաթը և չես գիտակցում լեռ բարձրանալու նպատակը: Քրիստոնյայի ուղին էլ, բազմաթիվ դժվարություններով հանդերձ, վերելք է, որ հստակ նպատակակետ ունի. կատարելության ուղով հաստատակամ դեպի բարձունք՝ դեպի Աստված, ընթանալ: Այդ վերելքի ճանապարհին քրիստոնյաները զորանում են միմյանց հետ հաղորդակցությամբ, միասնական և փոխադարձ աղոթքներով, ուխտի ճանապարհներով, Ս. Պատարագին մասնակցությամբ ու առաքինազարդ կյանքով:  

Մայիսի 6-ին Զորավոր Ս. Աստվածածին եկեղեցու համայնքը ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ ուխտի ճանապարհ անցավ՝ ուղևորվելով դեպի Կոտայքի և Գեղարքունիքի թեմերի սրբավայրեր: Համայնքի միասնական աղոթքները հնչեցին Կոտայքի թեմի Զորավանի Զորավար կամ Ս. Թեոդորոս եկեղեցում (7-րդ դ.), Գեղարքունիքի թեմի Ծաղկունքի Ս. Հարություն, Ս. Սարգիս (7-րդ դ.) և Դդմաշենի Ս. Թադեոս (7-րդ դ.) եկեղեցիներում: Ուխտավորների շուրթերից հնչած միասնական աղոթքներն ուղղված էին Հայոց աշխարհի և Հայ եկեղեցու զորացմանն ու շենացմանը: Հոգենորոգ ուղին ևս մեկ անգամ զորացրեց ուխտավորներին դեպի Աստված տանող ճանապարհին:

Մեր Տերը՝ Հիսուս Քրիստոս, ասել է. «Եկե՛ք Ինձ մոտ դուք բոլո՛րդ, հոգնածնե՛ր և բեռնավորվածնե՛ր, և Ես պիտի հանգիստ տամ ձեզ: Վերցրե՛ք Իմ լուծը ձեզ վրա և սովորեցե՛ք Ինձնից, որովհետև հեզ եմ ու սրտով խոնարհ, և դուք ձեր հոգեկան հանգստությունը պիտի գտնեք, քանի որ Իմ լուծը տանելի է, և Իմ բեռը՝ թեթև» (Մատթ. 11:28-30): Տերն ասաց՝ Իմ բեռը թեթև է. հավատը քրիստոնյայի համար ծանր բեռ չէ, այլ հոգին դեպի երկինք բարձրացնող թևեր: Դեպի Աստված տանող ուղին գուցե լի է խոչընդոտներով ու դժվարություններով, բայց Տերն Իր հետևորդների հետ է, բավական է միայն սրտանց աղոթել, և Տերն Իր վրա կվերցնի Իրեն հուսացողների հոգսերը ու վերելքը կդառնա դյուրանցելի: Քրիստոս քրիստոնյայի կյանքի իմաստն է, քանի որ Ինքն է կյանքը (Հովհ. 14:6): Եվ որքան էլ մարդկության թշնամին ջանք թափի, չի կարող հաղթել եկեղեցուն, քանի որ Քրիստոսի խոսքի համաձայն՝ դժոխքի դռներն այն չպիտի հաղթահարեն (Մատթ. 16:18), չի հաղթահարի, քանի որ Քրիստոս Իր հետևորդների հետ է մինչև աշխարհի վախճանը:

Կարինե Սուգիկյան