26 Փետրվար, Մեծ պահքի ԺԵ օր

Գրքեր

Գերեվարված ու անհայտ կորած զինվորների վերադարձին նվիրված ուխտագնացություն

Սեպտեմբերի 19-ին Զորավոր Ս. Աստվածածին եկեղեցու «Զորավոր» երիտասարդաց միությունը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, ուխտի մեկնեց Հայոց հոգևոր կենտրոն: Մինչ ուխտի ճանապարհ անցնելը երիտասարդները Զորավոր Ս. Աստվածածին եկեղեցում մասնակցեցին Ս. Պատարագին:

Հայոց հոգևոր կենտրոնի առաջին սրբավայրը, ուր այցելեցին երիտասարդները, Ս. Հռիփսիմեի վանքն էր: Սրբուհու գերեզմանի առջև խոնարհվելով և նրա բարեխոսությանը դիմելով՝ երիտասարդները միասնաբար աղոթք հնչեցրին առ Տեր՝ գերեվարված ու անհայտ կորած զինվորների և նրանց տունդարձի համար: Հաջորդ սրբավայրում՝ Ս. Գայանե եկեղեցում, երիտասարդաց միության անդամները կրկին համախմբվեցին միասնական աղոթքով. Ս. Գայանե կույսի գերեզմանին այցելելով, սրբուհու բարեխոսությանը դիմեցին և Ս. Ներսես Շնորհալու «Հաւատով խոստովանիմ» աղոթաշարի քսանչորս աղոթքներն ասացին:

Անկեղծ ու ջերմեռանդ սրտով հնչած համատեղ աղոթքներն իսկապես կարող են մարդու կյանքը դրականորեն փոխել և Տիրոջ մեծագույն օրհնությանն ու ողորմածությանն արժանացնել: «Աստված դուռը չի փակում Իր ծառաների առջև, եթե աղոթքով են մոտենում Նրան: Ընդհակառակը, այդ դուռը միշտ բաց է Աստծուն փնտրողների առջև, քանզի Նա ասում է. «Խնդրեցե՛ք Աստծուց և Նա կտա ձեզ, փնտրեցեք և կգտնեք, բախեցե՛ք և կբացվի ձեր առաջ» (Մատթ. 7:7)՝ դրանով ատահայտելով խնդրողին ամեն բան տալու Իր պատրաստակամությունը»,- ասել է Ս. Եփրեմ Ասորին:

 

Կարինե Սուգիկյան

 

19.09.21
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․