Տերն առատորեն Իր շնորհներն է բաշխում Իր հետևորդներին և ցանկանում, որ յուրաքանչյուր ոք այդ շնորհները գործածի նաև հանուն մերձավորի՝ Տիրոջը փառաբանելով ոչ միայն խոսքով, այլ նաև գործով: Շնորհների ճիշտ գործածումը նպաստում է, որ Քրիստոսի Մարմինը՝ եկեղեցին, աճի և զորանա: «Եվ երբ յուրաքանչյուր մաս գործում է ինչպես որ պետք է, մարմինն աճում և զորանում է սիրո մեջ» (Եփես. 4:15-16): Ինչպես շնորհներն են տարբեր, այնպես էլ ծառայության կերպերը. մեկը քրիստոնյայի կոչման բարձրությունն արտահայտում է բարի գործերով, ողորմածությամբ և հեզությամբ, ինչ-որ մեկը՝ իմաստուն խոսքերով, մյուս անդամը՝ ուսուցանելով, մյուսը՝ հիվանդին խնամելով, ինչ-որ մեկը՝ եկեղեցաշինությամբ, մյուսը՝ հայրենիքին ծառայելով: Եկեղեցու հայրերից Պավել պատրիարքն ասել է. «Լինել մարդ՝ նշանակում է գիտակցել, որ Աստծու առջև ենք կանգնելու և պատասխան տալու, թե ինչպես ենք օգտագործել այն շնորհները, որոնք Նա մեզ պարգևել է»:
Ավագյան Սերոբը՝ (32 տ.) որպես Արցախի ՊԲ-ի ծառայող, աստվածատուր իր շնորհը գործածել է՝ հայրենիքին իր ծառայությունը բերելով: Հունիսի 24-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը, ՀՀ ԶՈՒ հոգևոր առաջնորդ Տ․ Մովսես վրդ․ Սարգսյանի միջնորդությամբ, որպես սիրո և երախտագիտության արտահայտություն, Ավագյան Սերոբին փոխանցեց 100 000 դրամ, որ տրամադրել էր ամերիկաբնակ Կարինե Ավագյանը: Սերոբը՝ որպես հրանետային վաշտի 1-ին հրանետային դասակի հրամանատար և ավագ լեյտենանտ, մասնակցել է արցախյան վերջին պատերազմին: Պատերազմը սկսվելուց տասներկու օր անց՝ հոկտեմբերի 8-ին, ծանր վիրավորում է ստացել և մինչև օրս գտնվում է բուժման մեջ: Սերոբն իր ծնողների, տատիկի և քույրերի հետ բնակվում է Ստեփանակերտ քաղաքի Հեքիմյան 4, բն. 30 հասցեում: Զինծառայողի ընտանիքն իր երախտագիտությունը հայտնեց Տեր Գրիգորին և աջակից անձին:
Կարինե Սուգիկյան
Զորավոր Սուրբ Աստվածածին եկեղեցի