Գրքեր

Խոնարհությունից սատանան փոշու է վերածվում

Խոնարհությունը հսկայական ուժ ունի: Խոնարհությունից սատանան փոշու է վերածվում: Այն ամենաուժեղ շոկային հարվածն է սատանային: Այնտեղ ուր խոնարհություն կա՝ սատանայի համար տեղ չկա: Իսկ, եթե սատանայի համար տեղ չկա, ուրեմն գայթակղություններ էլ չկան: Մի անգամ, մի ճգնավոր սատանային ստիպեց «Սուրբ Աստված…»-ն ասել: « Սուրբ Աստված, Սուրբ և Հզոր, Սուրբ և Անմահ» ասեց ու կանգ առավ, «ողորմյա մեզ» չասաց: «Ասա՛ «ողորմյա մեզ»: Բայց ի՞նչ, եթե այդ բառերն ասեր, ապա հրեշտակ կդառնար: Սատանան ամեն բան կարող է ասել, բացի՝ «ողորմյա մեզ»-ից, որովհետև այդ բառերն արտասանելու համար խոնարհություն է անհրաժեշտ: «Ողորմյա մեզ» խնդրվածքի մեջ խոնարհություն կա, և Աստծո մեծագույն ողորմությունը խնդրող հոգին ստանում է խնդրածը:

Ինչ էլ որ անելիս լինենք, անհրաժեշտ է խոնարհություն, սեր և ազնվություն ունենալ: Դա շատ հեշտ է, այդ մե՛նք ենք բարդացնում (մեր հոգևոր կյանքը): Փորձենք սատանայի կյանքը հնարավորինս բարդացնել և թեթևացնել մարդու կյանքը: Սերն ու խոնարհությունը հեշտ են մարդու համար և դժվար՝ սատանայի: Նույնիսկ թույլ, վատառողջ, ճգնավորության համար ուժ չունեցող մարդը կարող է խոնարհությամբ հաղթել սատանային: Մեկ րոպեում մարդը կարող է հրեշտակի կամ սատանայի վերածվել: Ինչպե՞ս: Խոնարհությամբ կամ հպարտությամբ: Մի՞թե շատ ժամանակ պահանջվեց, որպեսզի Արուսյակ հրեշտակը սատանայի վերածվեր: Նրա անկումը մի քանի ակնթարթում տեղի ունեցավ: Փրկվելու ամենահեշտ միջոցը սերն ու խոնարհությունն են: Այդ պատճառով էլ պետք է սիրուց ու խոնարհությունից սկսենք, իսկ հետո անցնենք մնացածին:

Աղոթեք Քրիստոսին, որպեսզի մշտապես ուրախացնենք Նրան և վշտացնենք սատանային, եթե դժոխային տառապանքն այդքան դուր է գալիս նրան և չի ցանկանում ապաշխարել:

 

 

Հայր Պաիսիոս Աթոսացու «Ցավով և սիրով՝ ժամանակակից մարդու մասին» գրքից

Ռուսերենից թարգմանությունը՝ Էմիլիա Ապիցարյանի

16.02.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․