Գրքեր

Մեծագույն ու սուրբ գործ է հայրենիքին ծառայելը

Ինչպես ընտանիքն է աճում և ամրանում սիրո, ջերմության, հոգատարության և խնամքի շնորհիվ, այնպես էլ հայրենիքը՝ որպես մեծ ընտանիք, բարգավաճում և զորանում է իր զավակների սիրո ծառայության շնորհիվ: Այս մեծ ընտանիքի բոլոր անդամները կոչված են միահամուռ ուժերով հասնելու ընդհանուրի բարիքին: Չկա մեկ օր կամ մեկ ժամ, որ ընտանիքի որևէ անդամ ցանկությամբ դեպքում չկարողանա քիչ թե շատ օգտակար լինել իր ընտանիքին: Երբ յուրաքանչյուր անդամ նախանձախնդրորեն կատարում է իր պարտականությունը, դառնում է ընտանիքի արժանի անդամը՝ այդ կերպ իր սիրո ծառայությունը մատուցելով հայրենիքին: Մեծագույն ու սուրբ գործ է հայրենիքին ծառայելը:

Իր սուրբ պարտականությունը հայրենիքի հանդեպ լիարժեք իրագործեց Էրիկ Գրիգորյանը (21 տ.), որ 2018 թ-ից որպես ժամկետային զինծառայող՝ ծառայել է Արցախի Մարտակերտի շրջանի Մատաղիսի զորամասում: Արցախյան վերջին պատերազմին Էրիկը մարտական գործողություններին մասնակցել է Մատաղիսի և Թալիշի ուղղություններում: Հոկտեմբերի 23-ին նա վիրավորվել է, ինչի հետևանքով անդամահատվել է նրա աջ ոտքը: Էրիկի ընտանիքը Շուշիից տեղափոխվել է Երևան և այժմ ժամանակավորապես բնակվում է Վանցյան 28 հասցեում:

Օգոստոսի 4-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը որպես սիրո և երախտագիտության արտահայտություն Էրիկին փոխանցեց պրոթեզ, որ տրամադրել էր Կանադահայոց թեմի Մոնթրեալի Ս. Լուսավորիչ Առաջնորդանիստ Մայր տաճարի հավատավոր զավակներից Ալեքսանդր Ֆարամազյանը և ամերիկաբնակ Նարոյան ընտանիքի կողմից 100 000 դրամ:

«Հայրենիքը չի տրվում այնպես, ինչպես ժառանգվում է հայրենական հարստությունը: Դա ձեռք է բերվում ամեն մի սերունդի և նրա առանձին անդամի կողմից, ձեռք է բերվում հայրենաճանաչումով, հայրենապաշտությամբ, նրան արժանի դառնալու ձգտումով: Կարելի է հայրենիքում լինել, բայց հայրենիքից չլինել, կարելի է հայրենիքում ապրել, բայց և այնպես հոգեհաղորդ չլինել նրան: Կարելի է, վերջապես, իրավապես հայրենատեր լինել, իսկ հոգեպես` անհայրենիք: Գերերջանիկ է այն մարդը, որ կարող է ասել՝ իմ հայրենիքում արևը ծագում է բոլորի և ամեն մեկի համար»,- ասել է Գարեգին Նժդեհը:

 

Կարինե Սուգիկյան

 

04.08.21
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․