23 Նոյեմբեր, Շբ
Պատմեց հայր Դանիելը, թե. «Ոմն քարահատ օրական վաստակում էր մի դանկ ոսկի: Մինչև երեկո ոչինչ չէր ուտում, ապա դրանով ուտելիք էր գնում և ուտում էր հյուրերի և աղքատների հետ, իսկ մնացորդներն ու փշրանքները գցում էր շներին և ոչինչ չէր պահում հաջորդ օրվա համար, բացի իր քարահատիչից: Նա ինձ հյուր ընդունեց, և երբ իմացա նրա կենսակերպը, երեք շաբաթ խնդրեցի Աստծուն՝ նրան ունեցվածք տալ, որպեսզի առավել շատ բարեգործություն անի: Տեսիլքի մեջ Տերը, որ կանգնած էր վեմի վրա թագավորի տեսքով, ինձ ասաց. «Բավական է նրան այն, ինչ ունի»: Ես հանդգնորեն պնդում էի՝ ունեցվածք տալ նրան, բայց Տերն ինձ ասաց. «Դառնո՞ւմ ես նրան երաշխավոր, որ կպահի իմ պատվիրանները»: Եվ ես ասացի` այո՛: Ասաց իր մոտ եղած զորքերին. «Լսեցի՞ք դուք»: Եվ եղավ այնպես, որ քար հանելիս քարահատը գտավ ոսկով լի կարաս և չկամեցավ ի հայտ հանել տեղում, այլ գրաստներ վարձելով՝ գնաց Կոստանդնուպոլիս` Հուստիանոս թագավորի մոտ, և ապարանքներ ստացավ և վերցրեց քաղաքի եպարքոսությունը: Եվ ես վերստին տեսիլքի մեջ տեսա Տիրոջը. Նա ինձ խեթ նայեց: Եվ ես իմանալով, թե ինչի համար, գնացի այն գյուղը, ապա տեղեկանալով` մեկնեցի Կոստանդնուպոլիս և նրա դռան մոտ մնալով չորս ամիս` չկարողացա տեսնել նրան, մինչև որ նրա ծառաները ծեծեցին ինձ և թողին կիսամեռ: Ես ողբալով ընկա սուրբ Աստվածածնի առաջ` աղաչելով ազատել ինձ այն երաշխավորությունից, և տեսա, որ Սուրբ Աստվածածինը, գրկած Տիրոջ ոտքերը, աղաչում էր ինձ համար: Տերն ինձ ասաց. «Արձակեցի քեզ. արի՛ գնա քո տեղը, իսկ ես այն մարդուն կվերադարձնեմ իր չափի մեջ»: Մեռավ Հուստիանոս թագավորը, և կալանավորելով Եվլոժիոս քարահատին և նրա ուրիշ երեք ընկերներին՝ խլեցին նրանց ողջ ունեցվածքը և ուզում էին սպանել Եվլոժիոսին: Նա՝ մուրացիկի շորեր հագած, եկավ իր գյուղը, մուրճ մուրաց և վերսկսեց իր գործն ու հյուրասիրությունը: Եվ ես լսելով՝ գնացի նրա մոտ, երկար ժամեր լացեցինք միասին, և ես պատմեցի նրան ողջ եղելությունը: Եվ նա ինձ ասաց. «Հիմա՛ էլ խնդրիր, հա՛յր, փոքրինչ ունեցվածք, որ կարողանանք վայելել»: Ես ասացի նրան. «Քա՛վ լիցի, թե նման բան մտքովս անցկացնեմ և համարձակվեմ իմ Տիրոջն ասել, Ում գործերը մեծ են, և իմաստությունն` անբավ»:
«Սուրբ հայրերի վարքն ու կենցաղավարությունը» գրքից, Հատոր Ա, Էջմիածին 2016
Զորավոր Սուրբ Աստվածածին եկեղեցի