17 Հուլիս, Եշ
Ժամանակակից աշխարհում բազմաթիվ խնդիրներով շրջապատված մարդը վաղ թե ուշ այս հարցումների առջև է կանգնելու՝ կա՞ արդյոք հուսալի մի աղբյուր, որ կառաջարկի իրեն ճիշտ լուծում գտնել, կսովորեցնի ճիշտ ուղի գտնել և խուսափել սխալներից, կօգնի շտկել թերությունները, կամ կա՞ արդյոք որևէ ուղեցույց, որը կօգնի իրեն ճիշտ գործել ցանկացած հանգամանքներում։ Հայ եկեղեցու համայնքային կյանքի կարևոր օղակներից կիրակնօրյա դպրոցը քրիստոնյա անձին դեռ փոքրուց ծանոթացնում է այդ կարևոր ուղեցույցին՝ Սուրբ Գրքին, նաև հայրաբանությանն ու Սրբազան Ավանդությանը՝ օգնելով կյանքում ճիշտ ուղի և լուծում ընտրել ու գտնել, խուսափել սխալներից, կամ գործելու դեպքում շտկել և դեպի Աստված ընթանալ:
Զորավոր Ս. Աստվածածին եկեղեցու «Զորավոր» կիրակնօրյա դպրոցն արդեն երեք ու կես տարի է, ինչ գործում է և նույնքան ժամանակ էլ երեխաներին ծանոթացնում է մարդկային կյանքի այդ կարևորագույն ուղեցույցին:
Հունիսի 29-ին «Զորավոր» կիրակնօրյա դպրոցի սաները, նրանց ծնողներն ու մանկավարժ Տաթև Պետրոսյանը, եկեղեցու հոգևոր հովիվ Տեր Գրիգոր քահանա Գրիգորյանի առաջնորդությամբ, տարեվերջյան ուխտագնացության մեկնեցին: Հասնելով սրբավայր՝ Բջնիի Ս. Աստվածածին վանք (11-րդ դ.), փոքրիկ ուխտավորները Տեր Հոր առաջնորդությամբ միասնաբար աղոթեցին՝ Սուրբ Աստվածամոր բարեխոսությունը հայցելով Հայոց ազգի, եկեղեցու և բանակի համար, ծանոթացան սրբավայրի պատմությանը, ապա ունեցան սիրո ճաշ և հետաքրքիր զրույց Տեր Հոր հետ, որի ընթացքում պատմեցին իրենց նախասիրությունների մասին:
«Կիրակնօրյա դպրոցը երեխաների հոգևոր և բարոյական կրթությամբ ու դաստիարակությամբ զբաղվելուն զուգահեռ նպաստում է, որ երեխաները մասնակից դառնան եկեղեցական արարողություններին և միջոցառումներին, ուխտագնություններին: Ամեն մի ուխտագնացություն հնարավորություն է, որ երեխան առավել լավ ճանաչի ու սիրի մեր հոգևոր ժառանգությունը, մեր հայրենիքը: Մեր կիրակնօրյա դպրոցի հաջող աշխատանքի կարևոր պայմաններից մեկը աշակերտների ընտանիքների հետ սերտ շփումն է, որ կայանում է նաև ուխտագնացությամբ: Ուրախալի է տեսնել ծնողների ակտիվ մասնակցությունը կիրակնօրյա դպրոցի, նաև եկեղեցական կյանքին, քանի որ մեր հոգևոր և բարոյական ավանդույթների պահպանողն ու փոխանցողը քրիստոնյա ընտանիքն է»,- ասաց Տեր Գրիգորը:
Կարինե Սուգիկյան
Զորավոր Սուրբ Աստվածածին եկեղեցի