Քրիստոնյայի կյանքի նպատակը «հաղորդակից լինելն է աստվածային բնությանը»

Քրիստոնեական կրոնն ուշագրավ է նրանով, որ մարդուն անսահմանափակ հոգևոր հնարավորություններ է տալիս ոչ միայն Աստծու որդի կոչվելու, այլ նաև Երկնավոր Հորը նմանվելու: Որքան առավել է քրիստոնյան ձգտում նմանվել իր Երկնավոր Հորը, այնքան առավել խորն ու խորհրդավոր է դառնում Հոր հետ կապն ու միությունը:

Մեր Տերը՝ Հիսուս Քրիստոս, ասել է. «Ով սիրում է Ինձ, կգործադրի Իմ խոսքերը. Իմ Հայրն էլ կսիրի նրան, և Ես ու Իմ հայրը կգանք նրա մոտ և կբնակվենք նրա հետ» (Հովհ. 14:23): Քրիստոնյայի կյանքի նպատակը «հաղորդակից լինելն է աստվածային բնությանը» (Բ Պետր. 1:4): Այդ նպատակն այնքան բարձր է, որ երբեմն այն մարդու համար թվում է անհասանելի, բայց Տիրոջ օգնությամբ մարդն աստիճանաբար դեպի վեր, դեպի Աստված է բարձրանում: Այդ պատճառով է Սուրբ Գիրքը եկեղեցին նմանեցնում բարձր լեռան (Սաղմ. 2; Եսայի 2:2-3): Քրիստոնյա դառնալով՝ մարդը մոտենում է այդ լեռան ստորոտին, իսկ նրա հետագա կյանքը կատարելության աստիճաններով դեպի Հայրը բարձրանալն է:

Կատարելության աստիճաններից մեկն էլ մերձավորի հանդեպ ուշադրությունն է և հոգածությունը:

Օգոստոսի 1-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը, որպես սիրո և երախտագիտության արտահայտություն, Հարությունյան Խալիսին (43 տ.) փոխանցեց 100 000 դրամ, որ տրամադրել էր ամերիկաբնակ Սեդա Մկրտչյանը: Խալիսն իր ամուսնու և հինգ զավակների հետ վարձակալությամբ բնակվում է Նոր Նորքի 5-րդ զանգվածի Գալշոյան 19, բն. 18 հասցեում: Բազմազավակ ընտանիքի երեք զավակները չափահաս են, իսկ փոքրիկները տառապում են աուտիզմով: Երեխաների բուժման նպատակով ընտանիքը մի քանի ամիս է, ինչ Իջևան քաղաքից տեղափոխվել է Երևան: Խալիսի ամուսինը մասնակցել է արցախյան առաջին պատերազմին և երեք անգամ վիրավորվել, նաև կոնտուզիա ստացել: Առողջական խնդիրներով հանդերձ նա աշխատում է, որպեսզի հոգա իր ընտանիքի կարիքները:

Բազմազավակ ընտանիքն իր երախտագիտությունը հայտնեց աջակից անձին:

Կարինե Սուգիկյան