Գրքեր

Սիրիահայ համայնքի ուրախ Տարեմուտը

Դեկտեմբերի 17-ին Զորավոր Ս. Աստվածածին եկեղեցու սիրիահայ համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, «Տոսպիա» ռեստորանում նշեց Ամանորը՝ իրենց բնորոշ սովորությամբ, խաղերով և հետաքրքիր անակնկալներով: Ամանորյա տոնախմբությունը սկսվեց Տերունական աղոթքով:

Զորավոր Ս. Աստվածածին եկեղեցու սպասավոր Վաչագան սարկավագ Դոխոլյանը ներկաներին փոխանցեց Նավասարդ Սրբազանի օրհնությունը: «Այսօր բոլորս միաբանվել ենք նշելու գալիք Ամանորը: Մաղթանքս է, որ հայրենիքում հաստատված յուրաքանչյուր սիրիահայ օջախ ապրի աստվածային խաղաղության, օրհնության ու սիրո մեջ և Տիրոջ օգնությամբ հաղթահարի այն բոլոր դժվարությունները, որ ծառացել է իր առջև: Երբ Քրիստոսի առաքյալները քարոզչությունից վերադարձան ուրախությամբ և Տիրոջն ասացին, թե չար ոգիներն իսկ հնազանդվում էին իրենց: Հիսուս ասաց՝ մի՛ուրախացեք նրանով, որ չար ոգիները հնազանդվում են ձեզ, այլ ուրախացե՛ք, որ ձեր անունները գրված են երկնքում (Ղուկ. 10:17-20): Ամանորյա ուրախությունն ապրելով՝ չմոռանանք հոգ տանել, որ մեր անունները գրվեն երկնքում և Ս. Ծննդյան պահեցողությամբ պատրաստվենք նշելու Ս. Ծննդյան և Աստվածհայտնության տոնը»,- ասաց Վաչագան սարկավագը:

Ապա ներկաներին իր խոսքն ուղղեց Զորավոր Ս. Աստվածածին եկեղեցու «Հույսի միավոր» սիրիահայ տիկնանց օժանդակ միության ատենապետուհի Զարուհի Համալյանը. «Աստծո ողորմությամբ կրկին Ամանորի նախաշեմին ենք: ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և մեր համայնքի հոգևոր հովիվ Տեր Գրիգոր քահանա Գրիգորյանի աջակցությամբ ու գլխավորությամբ վերհիշում և նշում ենք մեր Ամանորը: Սիրելի և խորհրդավոր տոնին յուրաքանչյուրս նոր սպասումներ և հույսեր ունենք: Մեր խնդրանքն է, որ Տերն Ամանորին սովյալին հաց տա, հիվանդին՝ առողջություն, որբին՝ ծնող, անհավատին՝ հավատ և մեր հայաշունչ օջախներին՝ ժպիտ, հաղթանակ և երջանկություն»:

Զորավոր Ս. Աստվածածին եկեղեցու «Հույսի միավոր» սիրիահայ տիկնանց օժանդակ միության ջանքերով կազմակերպված ամանորյա տոնախմբությունը, խաղերը, անակնկալներն ու Կաղանդ պապի ներկայությունն իրապես տոնական դարձրեցին յուրաքանչյուր սիրիահայի օրը:

 

Կարինե Սուգիկյան

17.12.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․