Տարեվերջյան խոկումը «Զորավոր մանկունք»-ի երգեցողությամբ

Ինչպես ԱՀԹ-ի բոլոր եկեղեցիներում, այնպես էլ Զորավոր Սբ. Աստվածածին եկեղեցում ամեն երեքշաբթի Հանգստյան ժամերգության ավարտին կատարվում է խոկման արարողություն: Դեկտեմբերի 29-ին տարեվերջյան խոկման արարողությանն առաջին անգամ շարականներ և Սբ. Պատարագից հատվածներ երգեցին «Զորավոր մանկունք» երկսեռ, եռաձայն երգչախումբը:

Խոկման արարողությանը՝ քարոզին, խորհրդակատար Տեր Վահան քահանա Առաքելյանը մաղթեց ներկաներին աստվածային խաղաղություն՝ արժևորելու համար աստվածային պարգևը՝ կյանքը: Իսկ խոկումը, ըստ Տեր Հոր, անդրադարձ է մեր կյանքին, ձեռքբերումներին և բացթողումներին՝ հավատքի մեջ զորանալով առաջնորդվելու համար դեպի աստվածային անսահման կատարելություն:

«Ժամանակը ճիշտ գործածենք՝ արժանանալու համար աստվածային սիրուն և օրհնությանը: Հոգու բերկրությամբ, Սբ. Ծննդյան պահքով օրըստօրե մոտենում ենք մեր Փրկչի Ծննդյան սրբազան իրողությանը: Աստվածային սերն արտահայտվեց Իր Որդու Ծննդյամբ, այդ սերն ընդունելով մեր հոգուց ներս, Բեթղեհեմյան աստղի առաջնորդությամբ մեր սերն ու երկրպագությունը հայտնենք մանուկ Փրկչին»,- ասաց Տեր Հայրը:

Խոկման հոգենորոգ արարողության ավարտին ներկաներն աղոթեցին «Զորավոր մանկունք»-ի շուրթերից հնչած շարականներով՝ «Խնկի ծառի նման ես», «Մեծացուսցէ», «Այսօր տօն է Սբ. Ծննդյան», «Այսօր ձայնն հայրական» և Սբ. Պատարագի հետևյալ հատվածներով՝ «Քրիստոս ի մէջ մեր յայտնեցաւ», «Տեր ողորմեա»:

Ծնունդ առնող մի նոր հրաշք, աստվածային մի պարգև է համարում Տեր Վահանը համայնքային կյանքում գործող «Զորավոր մանկունք» երգչախումբը: Տեր Հոր խոսքով, փոքրիկներն իրենց իսկ հավատով, նվիրումով և անարատ երգեցողությամբ աստվածային ներկայությունն են բացահայտում մեր մեջ: Եվ նրանք շատ ու շատ անգամներ, լուսավորվելով Բեթղեհեմյան աստղի լույսով, լուսավորելու են իրենց շուրջն իրենց իսկ երգերով:

Տեր Վահանը ներկաների անունից իր շնորհակալությունը հայտնեց ԱՀԹ առաջնորդական փոխանորդ Տեր Նավասարդ արքեպիսկոպոս Կճոյանին, ում հայրական օրհնությամբ է գործում «Զորավոր մանկունք» երգչախումբը: Շնորհակալություն հայտնեց նաև հոգևոր հովիվ Տեր Գրիգոր քահանա Գրիգորյանին, ում անմիջական նախաձեռնության, սիրո և նվիրումի արդյունքն է երգչախումբը, ինչպես նաև երգչախմբի գեղարվեստական ղեկավար Գոհար Հարությունյանին և զորավոր մանուկներին:

Արարողության ավարտին Տեր Գրիգորն ու Տեր Վահանը Սրբազան Հոր կողմից նվերներ հանձնեցին «Զորավոր մանկունք» երգչախմբին:

Ինչպես նշեց երգչախմբի խմբավար Գոհար Հարությունյանը, երգչախումբն երգեց «Այսօր տօն է Սբ. Ծննդյան» շարականի երկու մշակումներ, որոնց հեղինակը միջնադարյան երաժշտության մասնագետ, հայկական վիոլայի մենակատար, կոմպոզիտոր Գրիգոր Առաքելյանն է: Շարականի երկրորդ մշակումը կոմպոզիտորի ամբողջական աշխատանքն էր՝ հիմքում ունենալով ժողովրդական մոտիվը: Կոմիտասյան մշակումներից երեխաները կատարեցին «Այսօր ձայնն հայրական»-ը, «Քրիստոս ի մէջ մեր յայտնեցաւ» և «Տեր ողորմեա»-ն:

Տարեվերջյան խոկման արարողությունը հոգևոր անսպառ լույսով լուսավորեց և լիացրեց ներկաների հոգին:

Կարինե Սուգիկյան