Սրբերի հոգևոր սխրանքները բոլոր ժամանակներում վկայել են առաքինաբար ապրելու ծարավի մասին: Հոգևորի հանդեպ ծարավը մարդու մեջ բնական պահանջ է, քանի որ մարդն արարվել է Աստծո պատկերով և նմանությումբ: Աստծով արարված հոգին ձգտում է իր Աղբյուրին, փնտրում է Աստծուն և Նրա հետ հաղորդակցությունը: Հոգևորի հանդեպ ծարավ ունեցողը ծարավ է բարի գործերի: Յուրաքանչյուրի մեջ այդ ծարավն արթնացնելու մեծ փափագն ուներ Ս. Հովհան Ոսկեբերանը, երբ հորդորում էր և ասում. «Մարդն ամենից առաջ պետք է գթասրտություն ուսանի, քանի որ այս առաքինությունն է, որ մարդուն մարդ է դարձնում: Եթե ոչնչացվի ողորմածությունը, ապա բոլորը կկործանվեն, քանի որ երկրային կյանքը չի կարող կանգուն լինել առանց ողորմածության, համբերատարության և մարդասիրության»:
Եկեղեցիների սուրբ հարկերից ներս համախմբված համայնքները, հոգևոր սպասավորների առաջնորդությամբ, իրենց հոգևոր ծարավը հագեցնում են նաև այն սոցիալական ծրագրերով, որ կյանքի են կոչվում բարին գործելու մղումով: Սեպտեմբերի 27-ին Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը համայնքի Տիգրանյան ընտանիքի կողմից Սարգսյան Գոհարին (39 տ.) հանձնեց դրամական օգնություն (50 000 դրամ): Գոհարն իր ամուսնու, սկեսուրի և երկու զավակների հետ բնակվում է ք. էջմիածնի Կամոյի 4շ. 16 բն. հասցեում: Ընտանիքի ավագ զավակը՝ Գառնիկը (16 տ.), տառապում է աուտիզմով: Գոհարն ասաց, որ տղան ժամանակ առ ժամանակ պրոֆիլակտիկ բուժումներ է ստանում: Ընտանիքի մայրը շնորհակալություն հայտնեց աջակից ընտանիքին՝ օգնության ձեռք մեկնելու համար, քանի որ իրենք ֆինանսական դժվարություններ ունեն՝ ամուսնու մշտական աշխատանք չունենալու պատճառով:
Կարինե Սուգիկյան
Զորավոր Սուրբ Աստվածածին եկեղեցի